پێشبینیەکان یانەی چێڵسیان کردبووە پاڵەوان، بەڵام لەگەڵ دەستپێکردنی گێمی یەکەمی یارییەکەدا، یانەی بەنفیکا بەهێزتر دەرکەوت و چەندین هەلی ئاسانی گۆڵکردنیان دروستکرد، بەڵام سەرکەوتوو نەبوون لە هەژاندنی گۆڵی ئینگلیزەکان.
لەگەڵ دەستپێکی گێمی دووەمدا، هاوکێشەی یارییەکە گۆڕا، یانەی چێڵسی ناسنامەی خۆی وەکو یانەیەکی خاوەن ئەزموون و مێژوو سەلماند، لە خولەکی (59) دا یانەی چێڵسی گۆڵێکی بە پێی (فرناندۆ تۆرێس) ەوە تۆمار کرد و پێشکەوتنی خۆی ڕاگەیاند، لە خولەکی (68) دا یانەی بەنفیکا بە لێدانی سزا گۆڵی یەکسانبوونی تۆمارکردەوە و ئەنجامەکەشی هاوسەنگ کردەوە.
ئەنجامەکە تاکو تەواوبوونی کاتی یاسایی بە یەکسانبوونی (1-1) بەردەوام بوو و هەمووان چاوەڕوان بوون یارییەکە بگاتە کاتی زیادکردنی دوو گێمی ئیزافی، بەڵام لەو دەمانەدا و لە خولەکی (93) ی یارییەکەدا (ئیڤانۆڤیتشی) بەرگریکاری سڕبی یانەی چێڵسی بە لێدانێکی سەری جوان گۆڵێکی یەکلاییکەرەوەی تۆمارکرد و بردنەوەی یانەکەی ڕاگەیاند.
شایەنی باسە یانەی چێڵسی ئینگلیزی پاڵەوانی چامپیۆنسلیگ بوو، ئەمساڵیش گرەوی لەسەر دەستەبەرکردنی نازناوی یۆروپالیگ بردەوە و خۆشی خستە دڵی هەوادار و هاندەرانییەوە.
إرسال تعليق