هەڵبژاردەی تۆپی پێی ئۆڵۆمپی عێڕاق توانی نازناوی یەکەمین پاڵەوانێتی ئاسیا بۆ خوار تەمەنی 22 ساڵی بەدەستهێنێت، پاش ئەوەی لە یاری کۆتاییدا و لەسەر یاریگای "سێپی" لە مەسقەتی پایتەختی وڵاتی عوممان، بە گۆڵێکی بێبەرامبەر لە هەڵبژاردەی تۆپی پێی ئۆڵۆمپی سعودیەی بردەوە.
هەڵبژاردەی ئۆڵۆمپی عێڕاق کە لەلایەن ڕاهێنەری بە توانا "حەکیم شاکر" سەرکردایەتی دەکرا، لە گێمی یەکەمی یارییەکە و لە خولەکی (33)، بە پێی یاریزانی لاوی ئاستباڵا "موهەننەد عەبدولڕەحیم"، تاقە گۆڵی یارییەکەی تۆمارکرد و نازناوی یەکەمین پاڵەوانێتی ئاسیای ئۆڵومپی مسۆگەر کرد.
هەڵبژاردەی ئۆڵومپی سعودیە لە خولەکی (28) ی یارییەکەدا، لێدانێکی سزای لەدەستدا، ئەوەش دەرفەتی دایە شێرەکانی ڕافیدەین دەستپێشخەری بکەن لە گۆڵ تۆمارکردن و پارێزگاریکردن لە ئەنجامەکە بە درێژایی یارییەکە.
شایەنی باسە هەڵبژاردەی ئۆڵۆمپی عێڕاق لە خولی یەکەمی پاڵەوانێتییەکەدا، سەرکەوتنی بەسەر هەڵبژاردەکانی ئۆڵومپی هەریەك لە سعودیە و چین و ئۆزبەکستان بەدەستهێنابوو، لە قۆناغی دووەمیشدا بە بردنەوەی لە هەڵبژاردەی ئۆڵومپی یابان، سەرکەوت بۆ یاری پێش کۆتایی، لە یاری پێش کۆتاییشدا سەرکەوتنی بەسەر هەڵبژاردەی ئۆڵومپی کۆریای باشوور بەدەستهێنا، لە یاری کۆتاییشدا توانی لە هەڵبژاردەی ئۆڵومپی سعودیە بباتەوە و مەدالیای زێڕ بۆ یاریزانان و جامی زێڕین لەسەر سەکۆی خەڵاتکردندا بەرز بکاتەوە.
ماوەتەوە بڵێین، کە یەکەمین پاڵەوانێتی ئاسیای ئۆڵۆمپی لەسەر یاریگاکانی وڵاتی عوممان بەڕێوەچوو.
إرسال تعليق