لە ئایینی ئیسلامیشدا، ئەرکە شەرعییە جیاوازەکان یەکێکیان جێگەی یەکێکی دیکە ناگرێتەوە لە جێبەجێکردنیاندا، بۆ نموونە: ئەگەر کەسێک نوێژ بکات، واتای ئەوە نییە کە نوێژکردنەکەی ڕێگەی پێبدات وازبێنێت لە بەڕۆژووبوون، بە پێچەوانەشەوە، هەر بۆیەش ئەگەر ئافرەتی موسڵمان نوێژ بکات و بەڕۆژوو بێت، ئەوە نابێتە پاساو و بیانوو بۆی تا وازبێنێت لە پۆشینی جلوبەرگی شەرعی.
هەر لەو سۆنگەیەشەوە، ئەگەر ئافرەتی موسڵمان نوێژ بکات و بەڕۆژوو بێت، بەڵام پابەند نەبێت بە پۆشینی جلوبەرگ و پۆشاکی شەرعییەوە، کە خوای گەورە فەرمانی پێکردووە بیپۆشێت، لە نوێژکردن و بەڕۆژووبوونەکە بە چاکەکار دادەنرێت، بەڵام بە وازهێنانی لە پۆشینی جلوبەرگ و پۆشاکی شەرعی، بە کارێکی خراپ لەسەری دەکەوێت.
دەربارەی ئەوەش، کە ئایا نوێژ و بەڕۆژووبوونی ئەو ئافرەتەی پابەند نییە بە خۆداپۆشینەوە (باڵاپۆشی) قەبول دەبێت یان نا؟، ڕای بەهێزی زانایانی ئیسلام لەسەر ئەو پرسە ئەوەیە، کە ئەوەیان پرسێکی تایبەت و پەیوەستە بە خوای گەورە، ئەو بە تەنیا خۆی دەزانێت کردەوەکانی چ کەسێک قەبول دەکات یان قەبول ناکات، بەڵام دەبێ ئەوەش بەردیدە بگرین، کە دەبێ موسڵمان گومانی باش بە خوای خۆی ببات و لاپەڕەیەکی سپی لەگەڵ پەروەردگارەکەی بکاتەوە، تێیدا تەوبە بکات لە گوناهەکانی و ڕوو لە گوێڕایەڵیکردن و ملکەچبوون بۆ فەرمانەکانی بکات.
خوای گەورەش زاناتر و بەرزترە.
إرسال تعليق