لەو ساڵانەی دواییدا، ئەو جۆرە پرسیاركردنانە بە شێوەیەكی بەرچاو بڵاوبوونەتەوە، كە نموونەیەكی تری ئەو پرسیارانە ئەوەیە، گوایە قوڕئانی پیرۆز نەیتوانیووە لەو سەردەمەدا سوود بە مرۆڤایەتی بگەیەنێت!، چونكە ئەو پێشكەوتنەی ئەوڕۆكە مرۆڤ پێیگەیشتووە، لە بیری هیچ كەسێكدا نەبووە!، ئەو گریمانەیەش ئەوە دەگەیەنێت، كە كاتێك خوای گەورە مرۆڤی دروستكرد، (حاشا لە زاتی خودا) نەیزانیووە مرۆڤ تا ئەو ئاستە پێشدەكەوێت، تاكو یاسا و ئەحكامی وای بۆ دابنێت، كە لەسەری بڕوات و لە سەردەمی جیهانگیرییدا كەڵكی لێوەربگرێت!.
ئایا ڕاستە، كە لە سەردەمی جیهانگیرییدا پێویستمان بە ئایین نییە؟!
لە سایەی كەڵەكەبوونی ئەو بڕە زۆرەی دەستكەوتەكانیش، كە زادەی شۆڕشی زانیاری و تەكنەلۆژیای سەردەمن، هەندێك دەپرسن: قسەكردن لەسەر كافر و مونافیقەكان چ نرخێكی هەیە؟!، ئەی سوودی باسكردنی موسا و فیرعەون، سولەیمان و موڵكەكەی لەسەر زەوی و تاد.. چییە؟!، ئینجا كەی باوی باسی كافر و ئیمانداران ماوە؟!، تەنانەت خاوەنی ئەو پرسیارانە دوورتر لە سنوورەكە تێپەڕیوون، كاتێك باوەڕیان وایە، كە ئێمە لە چەرخێكی زێڕینداین و پێویستمان بە ئایین نییە!، چونكە بانگەشەكردن بۆ كوفر و بێدینی بوونی نییە، وەكو ئەوەی لە چەرخەكانی ڕابردوودا هەبووە!.جێگەی سەرسوڕمانێكی قووڵیشە!، كە بەو بەهەڵەداچوونانە، فێڵ لە خۆمان و ئەوانی تریش بكەین، چونكە ئێمە و ئەوانیش باش دەزانن، كە قوڕئانی پیرۆز، قسەی خودای بەدیهێنەرە، كە ئەو زانایە بە دروستكراوەكانی زیاتر لە خەڵكانی تر، كە وابێ چۆن دەبێت وای دابنێین (حاشا لە زاتی خودا)، كە نەتوانێت ئاگاداری ئەوە بێت، كە لە ڕۆژگارێكدا ژیانی مرۆڤەكان پێشكەوتنی گەورە بەخۆیەوە دەبینێت؟!!، یان چۆن دەبێت باوەڕ بەوە بكەین، كە خودای گەورە كارێكی جێبەجێكردووە و دروستكراوێكی دروستكردووە، كە لە سەردەمانێكدا ناتەواوی تێدا ڕوودەدات؟!!.. نەخێر، هەرگیز وانییە، چونكە خودای گەورە توانای بەسەر هەموو شتێكدا هەیە و، بە پوختی و ڕێكوپێكی دروستكراوەكانی ئەفڕاندووە، ئەو گەردوونەشی بە گوێرەی سوننەت و سیستەمێكی جێگیر كۆنتڕۆڵكردووە، ئەو هێزەش، كە لە حاڵی نەبوونییدا، هیچ شتێك لە سەر زەویدا نەدەوستا، ئاویشی لەسەر نەدەمایەوە، تەنانەت بوونەوەرەكانیش هەر هەموویان، بەڵكو ئەو گونجاویی و ڕێكەوتنەش نەدەبوو، كە لە نێوان هەموو دروستكراوەكانییدا هەیە لەو گەردوونە بەرفراوانەی، كە لە ڕەنگ و شێوەكانیاندا جیاوازن.
چ جۆر دژێتییەك لە نێوان ئایەتەكانی قوڕئاندا دەبینن؟!
هەروەكو كەسانێكی تر هەن، كە ئایەتەكانی قوڕئانی پیرۆزیان كردووەتە كەرەستەیەك بۆ گاڵتەجاڕی، كاتێك تۆ دەیانبینی بەدوای ئەو ئایەتانەدا دەگەڕێن، كە لە ڕووكەشدا دژێتیان تیادا بەدیدەكرێت، بەبێ كەمترین شارەزایی و گەڕانەوە بۆ ئەوەی، كە ئەو پەرتووكە (قوڕئانی پیرۆز)، چەندین زانستی تایبەت بە خۆی هەیە، كە شرۆڤەی كرۆكە ڕاستەقینەكانیمان بۆ دەكەن و، ناڕوونییەكانمان بۆ لادەبەن و، هۆكاری بوونی دژێتی ڕواڵەتییانەی نێوانیان ڕووندەكەنەوە، ئەوەش پاش ئەوەی، كە ئایەتە ناسیخەكان لە ئایەتە مەنسوخەكان بە شێوەیەكی ئاشكرا جیا دەكەنەوە، یان خوێندنەوەی پوخت لەسەر ئەو ئایەتانە دەخەنە بەردەست، كە دەرهەق بە مەسیحی و یەهودییەكان دابەزیوون و لە پێش دەركەوتنی خۆری ئیسلام مردوون و، خودای گەورەش لێپرسینەوەیەكی دادگەرانەی بۆ دەستەبەركردوون، بەوەی هەر یەكێك لەوان، بە گوێرەی ئایینەكەی خۆی، حیسابیان لەگەڵ دەكرێت، كە پێش هاتنی ئیسلام پابەند بوون پێیەوە، بەڵام كەسانێك كاتێك ئەو ئایەتە دەخوێنەوە: "إِنَّ الَّذِينَ آَمَنُوا وَالَّذِينَ هَادُوا وَالنَّصَارَى وَالصَّابِئِينَ مَنْ آَمَنَ بِاللَّهِ وَالْيَوْمِ الْآَخِرِ وَعَمِلَ صَالِحًا فَلَهُمْ أَجْرُهُمْ عِنْدَ رَبِّهِمْ وَلَا خَوْفٌ عَلَيْهِمْ وَلَا هُمْ يَحْزَنُونَ" (البقرة/ 62)، واتە: بێگومان، ئەوانەی باوەڕِیان هێناوە (لە ئوممەتی محمد ـ صلی الله علیه وسلم ـ)، ئەوانەشی بوونەتە جوولەكە (شوێنكەوتەی راستەقینەی موسان)، گاورەكانیش (كە شوێنكەوتەی راستەقینەی عیسان)، (صابئة) ش (كە شوێنكەوتەی راستەقینەی داودن)، ئەوانە هەر دەستەیەكیان باوەڕِی دامەزراوی هێنا بێت بەخوا و رۆژی دوایی و، كار و كردەوەی چاكی ئەنجام دابێت، ئەوانە پاداشتیان لای پەروەردگاریانە، نە ترس و بیمیان دەبێت، نە غەم و پەژارەش ڕوویان تێدەكات.. بەڵێ، ئەو كەسانە بڕوایان وەهایە، كە خودای گەورە بە هەر ئایینێك ڕازییە، كە مرۆڤ بیەوێت و باوەڕی پێبكات!، چونكە بە قسەی خۆیان، ئامانجی یەكەم و كۆتایی، كە دەبێت مرۆڤ هەوڵی بۆ بدات، پەرستنی خودای تاك و تەنیایە، بەبێ لەبەرچاوگرتنی ئەوەی، كە ئەو پەرستنە، لە ڕێگەی هەر ئایینێكەوە بێت، كە مرۆڤ بیەوێت!، ئەوان واشی دادەنێن، كە ئەو ڕاڤەیە، هیچ تۆزی لەسەر نییە!!، بەڵام كاتێك ئێمە و ئەوانیش ئەو ئایەتە دەخوێنینەوە:"وَمَنْ يَبْتَغِ غَيْرَ الْإِسْلَامِ دِينًا فَلَنْ يُقْبَلَ مِنْهُ وَهُوَ فِي الْآَخِرَةِ مِنَ الْخَاسِرِينَ" (سورة آل عمران ـ 85)
واتا: جا ئەوەی بێجگە لەئاینی ئیسلام، پەیڕەوی هەر ئاینێكی تر بكات، لێی وەرناگیرێت، لەقیامەتیشدا، لە خەسارەتمەند و زەرەرمەندانە.. ئیدی ڕاستییەكە وەكو ڕۆژی ڕوون دەردەكەوێت، چونكە ئەو ئایەتە بەسە بۆ وەڵامدانەوەی ئەو جۆرە بیروباوەڕانەی، كە ئەوڕۆكە لەلای كەسانێك ئاوەها باو و جێی ڕەواجن و، هەر لەو سۆنگەیەشەوە، گومانیان لە گشتگیری ناوەڕۆكی قوڕئانی پیرۆز بۆ دروست دەبێت!.ئایا لە قوڕئاندا ئەحكامی هاووێنەی واقیعی ئێستا بەدیدەكرێت؟!
پێویستە ئەوە بزانین، كە خودای گەورە پەرتووكەكەی (قوڕئانی پیرۆز) وەكو دەستوورێكی ئیلاهی تەواو و گشتگیر بۆ سەر ئۆممەتی حەزرەتی موحەممەد (دخ) ناردۆتە خوارەوە، كە باسی ڕەوشتەكانی دروستكراوان و هێڵە گشتییەكانی ژیان و دوای ژیانی تێدایە، چیرۆك و پەند و ئەحكامی هاووێنەی واقیعی ئێستاشی لەخۆگرتووە، بەو واتایەی، كە قوڕئانی پیرۆز، بۆ سەردەم و كاتێكی دیاریكراو نەنوسراوە، بەڵكو لەگەڵ هەموو ڕۆژگارەكان دەگونجێت. ئەو پەرتووكە (قوڕئانی پیرۆز) باسی شتە زۆر گچكەكان لەخۆناگرێت، بەڵكو باس لە هێڵە گشتییەكان دەكات، بۆ ئەوەی مرۆڤ خۆی بە دوور بگرێت لە كەوتن و خلیسكان و دۆڕان، كە پێویستیشە، لەسەر شوێنەوارەكانی هەنگاو بنێت. قوڕئانی پیرۆز باس لە لایەنی بیروباوەڕی و بە یەك دانانی بەدیهێنەر و بڕیارنەدان بۆ هاوبەشی دەكات، ئەو پرسە جێگیرە و ناگۆڕێت، هەروەكو خودای گەورە باس لە سوننەتە جێگیرەكانی ژیان دەكات، بۆ نموونە: زاڵبوون و سەركەوتنی حەق و ئیمانداران، پاداشت و سزا لە دونیا و پێش ئاخیرەت، هتد..، ئەمانە بریتین لە چەندین سوننەتێكی چەسپاو، كە هەرگیز ناگۆڕدرێن.خولگەی گومانەكانی سەر قوڕئان لەسەر چ بنچینەیەك دەوەستێت؟!
زۆربەی ئەو گومانانەی لەسەر ئایین دەخولێنەوە (بە شێوەیەكی گشتی) و لەسەر قوڕئانی پیرۆز (بە شێوەیەكی تایبەت)، لەسەر یەك بنچینە وەستاون، ئەویش ئارەزووی نەفس و خۆشویستنی دونیا و هەڵخەڵەتانە بە جوانییە قەڵبەكەی، ئەوەش هەمان ئەو هۆكارەیە، كە پاڵی بە تاغوتەكان و پشتیوانەكانییانەوە نا بۆ دژایەتیكردنی پەیامە خوداییەكان، هەر لەو پێناوەشدا بوو، كە موشریكەكان دژایەتی قوڕئانی پیرۆزیان كرد، كاتێك كە دابەزییە سەر زەوی و، بانگەوازییەكەی حەزرەتی موحەممەدیان (دخ) بە درۆ دانا.. ئەوان دەیانەوێت جگە لەو لایەنە ڕوواڵەتییەی ژیان، هیچی تر نەبینن!!، ئەو شتە تەواو سەرقاڵی كردوون، هەر بۆیەشە، كە خۆیان و خەڵكیش لەو شتانە دوور دەخەنەوە، كە بەرپرسیارێتی و ئاخیرەت و ژیانی دوای مردنیان بیر بخاتەوە، لە هەر هەمووشی سەیرتر ئەوەیە، كە بانگەشە بۆ درۆیەكی زۆر ئاشكرا دەكەن!، كاتێك دەڵێن: ئێمە نزیكترینین لە خودای گەورە!، جا ئێوە دەزانن ئەوان ئەو بانگەشەیە لەسەر چ بنەمایەكەوە دەكەن؟!، لەسەر بنەمای ئاوەدانكردنەوەی زەوی لەسەر حیسابی ڕۆژی دوایی، لەسەر بنەمای ڕووكردنە خودا بەبێ هیچ وەسیلەیەك، وەكو بڵێی خودا بووەتە چەند كەرتێك (حاشا لە زاتی خودا)، كە هەر تایەفە و بە میزاجی خۆی خودایەكی بۆ خۆی داناوە كە لەگەڵ بیر و بۆچوونەكانی بگونجێت!!.ئەو بابەتە نوسراوە لەلایەن بەڕێوبەری سایتی "قەڵەم پرێس"، کە لە دوا ژمارەی گۆڤاری "پەیامی زانایان" بڵاوکراوەتەوە.
إرسال تعليق