پادشای نەفام و ناحاڵی

دەگێڕنەوە، پادشایەك لە خەودا وایزانی هەموو ددانەکانی شکان و کەوتن!، کە بە خەبەر هات بەپەلە ڕۆیشت بۆ لای یەکێك لە شیکەرەوەکانی خەون و، خەونەکەی بۆ گێڕایەوە.

شیکەرەوەی خەون: دڵنیایت ئەو خەونەت بینیووە؟!.
پادشا: بەڵێ دڵنیام!.
شیکەرەوەی خەون: لا حول ولا قوة الا بالله العلي العظيم، مانای خەونەکەت ئەوەیە، هەموو کەسوکارەکەت لە پێش تۆدا دەمرن!.
دەموچاوی پادشا تێکچوو، لەسەر ڕاسپاردەی ئەو دەستبەجێ شیکەرەوەی خەون خرایە زیندانەوە!.

شیکەرەوەیەکی تری خەون بانگهێشتکرا، ئەویش هەمان قسەی شیکەرەوەکەی یەکەمی کرد!، ئەویش دەستبەجێ خرایە زیندانەوە!.

شیکەرەوەی سێیەمیان هێنا، پادشا خەونەکەی بۆ گێڕایەوە.
شیکەرەوەی خەون: گەورەم، دڵنیایت ئەو خەونەت بینیووە؟!، یاخوا پیرۆزت بێ جەنابی پادشا!.
پادشا بە سەرسوڕمانەوە: بۆچی؟!.
شیکەرەوەی خەون بە دڵخۆشییەوە: مانای خەونەکەت ئەوەیە، تۆ لەناو کەسوکارەکەت لە هەموویان زیاتر تەمەندرێژتر دەبی!!.
پادشا بە سەرسوڕمانەوە: تۆ لەوە دڵنیایت؟!.
شیکەرەوەی خەون: بەڵێ بەڵێ گەورەم!!.
پادشا زۆر زۆر دڵخۆش بوو، لە پاداشتی ئەوەشدا، خەڵاتێکی گرانبەهای پێشکەشکرد!!.

بەڕێزان، تەماشای پادشای نەفام و بەدحاڵ بکەن!، ئەگەر ئەو لە هەموو کەسوکارەکەی زیاتر تەمەندرێژتر بێ، مانای ئەوە نییە کە هەموو کەسوکارەکەی لە پێش خۆیدا دەمرن؟!، کە ئەوەش هەمان مانای قسەی هەردوو شیکەرەوەکەی پێشووە!، بەڵام جیاوازەکە لە شێوازی دەربڕین و گوزارشتکردنەکەدایە، ئەگینا جیاوازی لە خودی ماناکەدا نییە!.