کاتژمێر (6) ئێوارەی دوێنێ، لەسەر یاریگای سانتیاگۆ بەرنابیۆ، یانەی ڕیال مەدرید میوانداری یانەی ئیلیچی کرد، دوای پێشکەشکردنی ئاستێکی بەرز، یانەی شاهانە بە ئەنجامی (3-0) یارییەکەی بردەوە و لە پێشەنگی ڕیزبەندی لیگا گیرسایەوە و فشارێکی زۆری لەسەر هەردوو یانەی بەرشەلۆنە و ئەتلەتیکۆ مەدرید دروستکرد کە هەرسێکیان بە هاوبەشی لە سەرووی لیستی ڕیزبەندییەکەوە بوون.
کاتژمێر (10) شەویش، یانەی بەرشەلۆنە لە هەرێمی باسك بووە میوانی یانەی ڕیال سۆسیداد، یانە باسکییەکە بە ئامانجی تۆڵەکردنەوە ڕووبەڕووی یانە کەتەلۆنییەکە بووەوە، چونکە چەند ڕۆژێك لەمەوبەر لە یاری پێش کۆتایی جامی شای ئیسپانیا لەسەر دەستی کەتەلۆنییەکان کرابووە دەرەوە، لە ئەنجامدا یانەی ڕیال سۆسیداد سەرکەوتنێکی گەورەی بەسەر یانە کەتەلۆنییەکە تۆمارکرد (3-1) و لەسەر عەڕشی پێشەنگی خولی ئیسپانیای هێنایە خوارەوە و سەرلیستی لالیگای بەخشییە یانەی شاهانە.
بە کەوتنی یانە کەتەلۆنییەکە و پێشڕەوی بەردەوامی یانەی شاهانە، یانەی ڕیال مەدرید بە شایستەیی چووە پێشەنگی خولی ئیسپانیا، بەرشەلۆنەش دەبێ چاوەڕێی ئەنجامی یانەی ئەتلەتیکۆ مەدرید بێت کە ئەمشەو لەسەر یاریگای بامبلۆنا دەبێتە مێوانی یانەی ئۆساسۆنا، بۆ ئەوەی دەربکەوێ ئایا پلەی دووەمی ڕیزبەندی لالیگا بۆ یانەی بەرشەلۆنە دەبێ یان بۆ یانەی ئەتلەتیکۆ مەدرید؟!.
إرسال تعليق