شتێك هەیە خودا پێی نازانێت، ئایا شتێك هەیە لەو گەردوونەدا خودا پێی نەزانێت؟!

لەوانەیە ناونیشانی ئەو بابەتە تا ڕادەیەك سەرسوڕهێنەر بێت، بەڵام ئەوە ڕاستییەکی قوڕئانییە و پێویستە هەموومان بیزانین. با پێکەوە لەو بابەتە وردببینەوە.

سێ بانگخواز بە لای قەومێكی ئاگرپەرست تێدەپەڕن و داوایان لێدەکەن دەستهەڵگرن لە ئاگرپەرستی و ڕووبکەنە خواپەرستی، بەڵام قەومەکە بە قسەیان ناکەن.

پیاوانی پادشای قەومەکە دێن و بانگخوازەکان دەستگیر دەکەن و دەیانبەنە لای پادشا، پادشاش نکۆڵی لە قسەکانیان دەکات، بۆیەش بانگی ساحیرە تایبەتەکەی دەکات بۆ ئەوەی گفتوگۆیان لەگەڵ بکات و بۆیان بسەلمێنێت کە قەومە ئاگرپەرستەکەی لەسەر حەقن.

ساحیرە تایبەتەکەی پادشاکە بە بانگخوازەکان دەڵێت: چەند پرسیارێکتان لێدەکەم، پێویستە وەڵامم بدەنەوە، بانگخوازەکان پێیدەڵێن: ئەگەر وەڵامی پرسیارەکانمان دایەوە، باوەڕ بە ئایینەکەمان دەهێنی؟.. ساحیرەکە گوتی: بەڵێ.. پادشا هەراسان بوو و گوتی: چۆن چۆنی ئەی ساحیر؟!.. ساحیرەکە گوتی: گەورەم دڵنیابە، چونکە ئەوانە ناتوانن وەڵامی پرسیارەکانم بدەنەوە.

ساحیرەکە پرسیارەکانی ئاراستەی بانگخوازەکان کرد و پێی گوتن:

• ئەو شتە چییە کە خودا پێینازانێت؟.
• ئەو شتە چییە کە خودا داوای دەکات لە بەندەکانی؟.
• ئەو شتە چییە کە لە گەنجینەی خودا نییە؟.
• ئەو شتە چییە کە لە لای مرۆڤەکان هەیە و لە لای خودا نییە؟.
• ئەو شتە چییە کە خودا لەسەر خۆی قەدەغە کردووە؟.

بانگخوازەکان تووشی سەرسوڕمان هاتن و کەوتنە بیرکردنەوە، بەڵام یەکێکیان هاواری کرد و بە ساحیرەکەی گوت: من وەڵامی پرسیارەکانت دەدەمەوە و دەستیکرد بە وەڵامدانەوە و گوتی:

• ئەو شتەی کە خودا پێینازانێت، هاوبەشە (شریك) لە موڵکەکەیدا: (( وَجَعَلُوا لِلَّهِ شُرَكَاءَ قُلْ سَمُّوهُمْ أَمْ تُنَبِّئُونَهُ بِمَا لَا يَعْلَمُ فِي الْأَرْضِ )) سوڕەتی (الرعد) ئایەتی (33)، واتای ئایەتەکە: نه‌فامان شه‌ريكيان بۆ خوا بڕيارداوه‌، تۆش بڵێ: ئاده‌ى ناوى ئه‌و بت‏ و هاوه‌ڵانه‌م بۆ بنێن كه‌ له‌ جياتى خوا ده‌يانپه‌رستن؟، ياخود به‌ هه‌موو عه‌قڵێكتانه‌وه‌ ده‌تانه‌وێت خوا ئاگادار بكه‌نه‌وه‌ به‌شتێك كه‌ ئه‌و زاته‌ نايزانێت له‌ زه‌ويدا؟!!.
• ئەو شتەش کە خودا داوای دەکات لە بەندەکانی، قەرزە: ((إنْ تُقْرِضُوا اللَّهَ قَرْضًا حَسَنًا يُضَاعِفْهُ لَكُمْ وَيَغْفِرْ لَكُمْ وَاللَّهُ شَكُورٌ حَلِيمٌ )) سوڕەتی (التغابن) ئایەتی (17)، واتای ئایەتەکە: ئه‌گه‌ر قه‌رز بده‌ن به‌خوا به‌شێوه‌يه‌كى چاك (مه‌به‌ست به‌خشينى ماڵ‏ و سامانه‌ له‌ پێناوى خوادا) ئه‌وه‌ خوا چه‌ند به‌رابه‌رى ده‌كات بۆتان، هه‌روه‌ها لێتان خۆش ده‌بێت، خواش سوپاسگوزاره‌ له‌سه‌ر به‌خشين كه‌ هه‌ر به‌خششى خۆيه‌تى و خۆڕاگره‌، مۆڵه‌تى ڕه‌زيله‌كانيش ده‌دات تا كاتى خۆى.
• ئەو شتەش کە لە گەنجینەی خودا نییە، هەژارییە.. گەورەیی بۆ خودای گەورە کە گەنجینەکەی پڕە، چۆن حەز بکات ئەوها دەیبەخشێت.
• ئەو شتەش کە لە لای مرۆڤەکان هەیە و لە لای خودا نییە، خێزان و منداڵە. 
• ئەو شتەش کە خودا لەسەر خۆی قەدەغەی کردووە، زوڵم و ستەمە. 

ساحیرەکە بە گوێبیستبوونی وەڵامەکان دەستیکرد بە گریان و گوتی: بەڵێ وایە، سوێند بە خودا ئایینەکەی ئێوە ڕاستە، ئەی چۆن دەتوانم ببمە موسڵمان؟، پادشا بە چاو لێ سوورکردنەوە هەڕەشەی لێکرد، بەڵام ساحیرەکە گوێی پێنەدا.. بانگخوازەکە پێیگوت: بڵێ: أشهد أن لا إلە إلا الله وأشهد أن محمدا رسول الله.. ساحیرەکەش شایەتومانی هێنا و گوتی: أشهد أن لا إلە إلا الله وأشهد أن محمدا رسول الله.. ئینجا هەموو ئامادەبوون بە یەكدەنگ گوتیان: أشهد أن لا إلە إلا الله وأشهد أن محمدا رسول الله.