بە پەیامێك، موسڵمانان هاندەدا بۆ نوێژکردن!

ئەستێرەی میسری یانەی چێلسی ئینگلیزی “موحەممەد سەڵاح”، بێجگە لە بایەخپێدان بە لایەنی هونەری، هاوکات بایەخ بە لایەنی ئایینیش دەدات و، بووەتە نموونە بۆ هەموو گەنجان لە سەرتاسەری جیهان.

لە هەنگاوێکی گرنگ و سەرنجڕاکێشی تازەیدا، “موحەممەد سەڵاح” لە ڕێگەی هەژماری تایبەتی خۆی لەسەر تۆڕی کۆمەڵایەتی “ئینستگرام”، پەیامێکی گرنگی ئاراستەی تێکڕای ئۆممەتی ئیسلامی کرد.

یاریزانەکە هاوپێچ لەگەڵ پەیامەکەیدا، وێنەیەکی سەرسوڕهێنەری کۆمەڵێك منداڵی موسڵمانی بڵاوکردووەتەوە، کە لە مزگەوتێکی نوقم بوو لە ئاودا نوێژ دەکەن!.

ئەو وێنەیە سەرنجی ئەستێرە میسرییەکەی ڕاکێشاوە و پاڵی پێوەناوە لە ڕێی هەژماری تایبەتی خۆی لەسەر تۆڕی کۆمەڵایەتی “ئینستگرام” کۆمێنتێکی لەسەر بنووسێت: “دەتوانیت لە هەموو شوێنێك نوێژ بکەیت، بە تەنیا ئەوە بکە”.

شایەنی باسە، لەوەتەی وەرزی نوێی خولی نایابی ئینگلیزی “پرێمەرلیگ” دەستیپێکردووە، “موحەممەد سەڵاح” بە دەست گوێپێنەدانی بەڕێوبەری یانەی بلوز “خۆزێ مۆرینیۆ” دەناڵێنێت، کە تا ئێستا لە هەموو یارییەکانی هەردوو پاڵەوانێتی پرێمەرلیگ و چامپیۆنزلیگ، تەنیا 10 خولەك بەشداری پێکراوە.