فرمێسك گرانبەهاترین شلەیە لە گەردووندا

فرمێسك بە تەنیا بریتی نییە لە چەند دڵۆپێك ئاو، کە لە چاومان دێنە خوارەوە، وەکو زۆرێك لە خەڵك ئەو تێگەیشتنەیان هەیە، بەڵکو ڕژانی هەستە پەنگخواردووەکانی ناخی مرۆڤە و گوزارشتی زۆر گەورەیان تێدایە.

بۆیە بە سادەیی بۆی مەڕوانن و هەوڵبدەن بە دوای گەوهەری ڕاستەقینەی پشت ڕشتنیان بگەڕێنن.

ئەگەر بمانەوێت پێکهاتەی فرمێسك ڕوون بکەینەوە، بە تەئکید جۆرێك لە سەرسوڕمانیمان بەسەردا دێت، چونکە 1%ـی فرمێسك بریتییە لە ئاو، 99%ـشی بریتییە لە هەستەکان، کە ئەوەش ڕەنگە زۆر کەس نەیزانیبێت و تێگەیشتنێکی دیکەی بۆ هەبووبێت.

فرمێسك چەندین جۆری هەیە، فرمێسکی پەرۆشی، فرمێسکی خۆشەویستی، فرمێسکی خۆشی، فرمێسکی خەم، فرمێسکی پێکەنین، فرمێسکی جیابوونەوە، فرمێسکی دوورکەوتنەوە، فرمێسکی بەیەکگەیشتنەوە، فرمێسکی چاوەڕوانی، فرمێسکی شکست، فرمێسکی سەرکەوتن، فرمێسکی لە خواترسان، فرمێسکی بیرکردنەوە، فرمێسکی شادبوون بە بینینی خوای گەورە و پێغەمبەر (دخ) و تاد.

بۆیە لە سۆنگەی ئەو ڕاستییانەوە، دەتوانین بڵێین، فرمێسك گرانبەهاترین شلەیە لە گەردووندا، هیچ شتێك نییە هێندەی فرمێسك گوزارشت لە هەقیقەتی ناخی مرۆڤ بکات.