هەر کە بەرگدرووەکە تەواو بوو لە بڕینەوەی پارچە قوماشە گەورەکە، مەقەسە بە نرخەکەی فڕێدایە سەر زەوی لەلای پێیەکانی..!، کوڕەزاکەشی وا بە سەرسوڕمانەوە لەو کارەی باپیرەی دەڕوانێ..!، پاشان بەرگدرووەکە دەرزی و داوی هێنا و دەستیکرد بە کۆکردنەوەی پارچە قوماشە کەرتکراوەکان بۆ ئەوەی کراسێکی نوێ و جوانی لێ دروستبکات، کاتێکیش کارەکەی تەواو کرد، دەرزییەکەی لە مێزەرەکەی سەر سەری هەڵکێشا و فڕێی نەدایە سەرزەوی!.
لەو ساتەوەختەدا، کوڕەزاکەی نەیتوانی سەرسوڕمانی خۆی لە کارەکانی باپیرەی بشارێتەوە..!!، بۆیە کوڕەزاکە پرسیاری کرد: باپیرە گیان، بۆچی مەقەسە بە نرخەکەت فڕێدایە سەر زەوی لەلای پێیەکانت، بەڵام دەرزییە هەرزانەکەت لە مێزەری سەر سەرت هەڵکێشا؟!.
باپیرەکە وەڵامی دایەوە: ڕۆڵە گیان، مەقەسەکە پارچە قوماشە گەورەکەی کەرت کەرت کرد و چەند پارچە قوماشێکی بچووکی لێ دروستکرد، بەڵام دەرزییەکە هەموو پارچە قوماشە بچووکەکانی کۆکردەوە و کراسێکی جوانی لێ دروستکرد.
پوختەی مەبەست.. باپیرەکە ویستی بە کوڕەزاکەی بڵێ: ڕۆڵە گیان، تۆ لەو کەسانە بە کە خەڵك کۆدەکەنەوە، لەو کەسانە مەبە خەڵك پەرت و بڵاو و پەرتەوازە دەکەن، بە واتایەکی دیکە، کەسەکان هەرچەند گەورە و گرانبەها بن، بەڵام گەر خەڵکیان پەرت و بڵاوکرد و یەکڕیزیان تێکدا، شایەنی ئەوەن بخرێنە بەر پێیان.. بەڵێ، کەسەکان هەرچەند بچووك و بێنرخیش بن، بەڵام ئەگەر خەڵکیان کۆکردەوە و کاریان بۆ یەکڕیزیان کرد، شایەنی ئەوەن بخرێنە سەر سەران.
إرسال تعليق