لەوانەیە لەو کاتانەی خۆت پێکەنی بیت هەستت بە سوودەکانی ئەو پێکەنینەت کردبێت، بەڵام توێژینەوە زانستی و پزیشکییەکان ئەو سوودانەی پێکەنین دەسەلمێنن کە خۆت هەستت پێیان کردووە، ڕاستی ئەو پەندەش پشتڕاست دەکەنەوە (پێبکەنە، دونیا بۆت پێدەکەنێ).
لەوبارەیەوە پێگەی (لاخلیرارین)ـی ئەڵمانی چەند ڕاستییەکی سەرسوڕهێنەری لەسەر پێکەنین بڵاوکردووەتەوە:
پوختەی توێژینەوەکان، کە لەلایەن پسپۆڕە دەروونناسەکانەوە ئەنجامدراون، خۆ ناچارکردن بە پێکەنین بەسە بۆ ئەوەی مەزاجت باشتر بێت، تەنانەت ئەگەر مەزاجیشت تەواو نەبێت وا دەکات هەستی ناوەوەت باشتر بێت.
- پێدەچێت پێکەنین بەهێزیی کۆئەندامی بەرگری لەش زیاد بکات، دواتریش باشترکردنی تەندروستی گشتی لەش دەستەبەر دەکات.
- توێژەرە سویدییەکان لە توێژینەوەیەکدا بۆیان دەرکەوتووە، کە پێکەنین ئامادەکراوە لە مرۆڤ، بەڵام کێشەکە ئەوەیە کە مرۆڤ جووڵە ناکات بۆ دەرخستنی پێکەنین.
- پێکەنین هانی جەستە دەدات بۆ دەردانی ماددەی (ئیندۆرفین) کە بەرپرسە لە هەستکردن بە بەختەوەری و کەمکردنەوەی گرژی.
- لێکۆڵینەوەیەکی زانستی ئاشکرایکردووە کە پێکەنین ئاسانترە لە گرژکردنی هەردوو برۆیەکان، چونکە پێکەنین ماسوولکەی کەمتر بەکاردەهێنێت بە بەراورد بە تووڕەبوون.
- پێکەنین لەسەر ئاستی جیهان بەوە ناسراوە کە نیشانەی بەختەوەرییە، دواتریش مەسافەی نێوان وڵاتان و شارستانییەتە جیاوازەکان نزیکتر دەکاتەوە، چونکە بەختەوەری زمانی هاوبەشی هەموو مرۆڤەکانە.
- پێکەنین 53 ماسوولکە لە ڕووخساری مرۆڤ بەکاردەهێنێت، ئەوەشیان هۆکارێکە بۆ سووتاندنی گەرمۆکەکان و یارمەتیدەر دەبێت بۆ کەمکردنەوەی کێشی لەش و ڕزگاربوون لە چەوری.
- پێکەنین توانایەکە پێشتر بەرنامەی بۆ دانراوە، ئینجا سەرەڕای ئەوەی منداڵەکان زۆربەی هەڵسوکەوتەکان لە چاودێریکردنی دەوروبەر فێر دەبن، بەڵام توانای پێکەنینیان بەبێ فێربوون بۆ دەستەبەر دەبێت.
- پێکەنین یارمەتیدەرە بۆ بەدەستهێنانی پلەبەرزی، چونکە توێژینەوەکان سەلماندوویانە کە پێکەنین ڕاکێشان و توانای مرۆڤ لەسەر دروستکردنی پەیوەندییەکان لەگەڵ خەڵک و متمانەبوون بە خۆی زیاد دەکات، ئەوەش دەرفەتی پلەبەرزی لە کارەکەیدا زیاد دەکات.
- پێکەنین جیاکەرەوەترین شتە لەلای مرۆڤ، چونکە دەتواندرێت مرۆڤی پێکەنیوو لە دووری 100 مەتر لە کەسانی دیکە جیا بکرێتەوە.
- ژنان لە پیاوان زیاتر پێدەکەنن، بەڵام ئەگەر هەردووکیان خاوەنی هەمان ئاستی کۆمەڵایەتی و زانستیی بن، بە هەمان ئەندازەی یەکتر پێدەکەنن.
- بە گوێرەی زانیاری توێژەران لە زانکۆی (کالیفۆرنیا)ـی ئەمریکی، پێکەنین 19 جۆری هەیە، توێژەرەکان ئەو پێکەنینانەیان دابەشکردووەتە سەر دوو بەش: پێکەنینی کۆمەڵایەتی، کە هاندەرە بۆ ماسوولکەی کەمتر، هەروەها پێکەنینی ڕاستەقینە (پێکەنین لە دڵەوە) کە پێویستی بە بەکارهێنانی ماسوولکەی زیاتر هەیە لە هەردوولای دەموچاو.
- زۆربەی پزیشکەکان باوەڕیان وایە کە منداڵەکان لە تەمەنی چوار بۆ شەش هەفتەیی دەستدەکەن بە پێکەنینی ڕاستەقینە، بەڵام لە ساتەوەختی لەدایکبوونیانەوە لە کاتی خەوتن پێدەکەنن.
بەو هیوایە پێکەنین ژیانتان جوانتر و گەشاوەتر بکات و، هەرگیز خەم و ناخۆشی و ناڕەحەتی کۆسپ و تەگەرە نەخاتە بەردەم وەدیهاتنی خواست و هیوا و خەونەکانتان.
إرسال تعليق