مەترسی لە چاوکردنی چاویلکە لە کاتی قسەکردن بە مۆبایل

لەو ساڵانەی دواییدا، مۆبایل بووەتە نیشانەیەك لە نیشانەکانی شۆڕشی زانیاری و پەیوەندییەکان، تەنانەت بووەتە یەکێك لە پێویستییەکانی ڕۆژانە.

ئینجا سەرەڕای مەترسییەکانیشی، بەڵام مرۆڤەکان ناتوانن دەستبەرداری بن، زۆربەی مەترسییەکانیش باس لە تیشکەکان و کاریگەرییەکانی لەسەر جەستە بە تایبەت "سەر" دەکەن.

بەڵام ئەوەی سەیرە، دەرکەوتنی مەترسییەکی نوێی مۆبایلە..!، کە شارەزایانی بواری تەندروستی باس لە مەترسی مۆبایل دەکەن لەسەر بەکارهێنەرانی چاویلکەی خۆری و پزیشکی، چونکە وەکو ئاماژەی بۆ دەکرێ، مەترسییەکە لەسەر ئەوان زیاترە بە بەراورد بە خەڵکی دیکە.

هۆکاری مەترسییەکەش لەوەدایە، کە چاویلکەکان چوارچێوەیەکی دەرەکییان هەیە کە لە کانزا دروستکراوە و وەکو سیستەمێکی هەوایی لەگەڵ سیستەمی هەوایی مۆبایل کار دەکات، هێزێکی موگناتیسیش لەو چوارچێوانە دەردەچێت کە کاریگەری ڕاستەوخۆی لەسەر تۆڕی چاو هەیە و ڕێژەی مژینی شەپۆڵەکانی کەهرۆموگناتیسی زیاتر دەکات، ئەوەش کاریگەری خراپی لەسەر بینین و دروستکردنی نەخۆشییە جیاوازەکانی چاو هەیە.

چارەسەرییەکەش ئاسانە و بەکارهێنەرانی چاویلکەی خۆری و پزیشکی دەتوانن خۆیان لەو مەترسییە بپارێزن، بەوەی لە کاتی ئەنجامدانی پەیوەندییە تەلەفۆنییەکان بە مۆبایل، بەکارهێنەران چاویلکەکانیان دابنێنن و کەمتر بەکاریبێنن، مەگەر لە کاتی پێویست نەبێت.