ئەو لە ڕێگەی ڕۆیشتن بەرەو ناوچەی "سۆما" لە هەرێمی "نابا" لە باکوری ویلایەتی کالیفۆرنیای ئەمریکی، چاوی بە پانتاییەکی سەوزی شەپۆڵگرتوو دەکەوێت کە دەستەملانێی ئاسمانی شینی ساف بووە لەگەڵ بوونی چەند کەرتە هەورێکی سپی سووك، لەو دەمەدا دەوەستێت و لە جوانییەکانی ئەو وێنە قەشەنگەی سروشتدا ڕادەمێنێ، دیمەنەکە لە ناخەوە سەرسامی دەکا..!، یەکسەر زوومی کامێراکەی ئاراستەی ئەو دیمەنە دڵگیرە دەکات و وێنەیەك لەو سروشتە ڕازاوەیەی بەردەمی دەگرێت، بەبێ ئەوەی بزانێت ئەو وێنەیە دەبێتە وێنە سروشتییە بەناوبانگەکە کە زۆرترین جار بینراوە کە دواتر وێنەکە بە "Bliss" ناسرا و بووە وێنە بەناوبانگەکەی باکگراوەندی ویندۆز XP.
کۆمپانیای مایکرۆسۆفت هەڵسا بە کڕینی وێنەکە لە "تشاك ئۆرێر" بە بڕە پارەیەکی نەزانراو، پاش ئەوەی کۆمپانیاکە ڕێککەوتنێکی نهێنی لەگەڵ وێنەگرەکەدا ئیمزا کرد و مافی خاوەندارێتی وێنەکەی لێ کڕی.
شایەنی باسە ژمارەی ئەو کەسانەی ئەو وێنەیان بینیووە بە یەك ملیار کەس خەمڵێنراوە، هەندێك ڕاپۆرتیش کە لە مایکرۆسۆفتەوە دەرچوون، دووپات لەوە دەکەنەوە کە وێنەکە دووەم گرانبەهاترین وێنەیە لە جیهان، بۆ زانیاریش گرانبەهاترین وێنە لە جیهان ئەو وێنەیەیە کە ناوی "Rhein II" هەڵدەگرێت و بە بڕی (4.3) ملیۆن دۆلار فرۆشراوە.
إرسال تعليق