بە درێژایی مانگی پیرۆزی ڕەمەزانیش، ڕۆژووەوان هەست بە كرانەوەیەكی تەواو دەكات بە ڕووی پێویستییە مەعنەوی و ڕۆحییەكان، ئەوەش بەرەنجامی سروشتی دەستبەرداربوونییەتی لە خواستە جەستییەكان، بۆیە ئەوەیان هاندەرێكی گرنگ دەبێت تا بە تامەزرۆییەوە و بە پەرستش و نزا و پاڕانەوە و زیكرەكان ڕوو لە خوای كردگار بكات، هەروەكو لە لایەنی دەروونیشەوە بەهێزتر و گەرموگوڕتر دەردەكەوێت، ویست و ورەبەرزی و وانەی دینداری گەورەشی دەستدەكەوێت، ئازایانەش بەرەنگاری شەپۆڵەكانی ئارەزوو و پاڵنەرەكانی هەوەسبازی دەبێتەوە، هەموو ئەوانەش بە پێدراوی هەرە گرنگ لە بەڕۆژووبوونەكەی هەژمار دەكرێن.
لێرەدا هەڵوێستە لەسەر گرنگترین سێ ئامانج دەكەین، كە دەبێت ڕۆژووەوان لە بەڕۆژووبوونەكەیدا بەرجەستەیان بكات:
یەكەم/ ئامادەگی ڕۆحی: زۆر گرنگە ڕۆژووەوان هۆشیاری و ئاگاهی و زانیاری لەسەر لایەنی ڕۆحگەرایی هەبێت و بەوپەڕی توانا و تامەزرۆییەوە لە بەڕۆژووبوونەكەیدا ڕەنگڕێژی بكات، ئەوەش لە ڕێی ئاوێزانبوونی لەناو جیهانی پاڕانەوە و نزا و داواكردنی لێخۆشبوون و خوێندنەوەی قوڕئانی پیرۆز و وتنەوەی زیكرەكان و تاد..ەوە دەبێت.
دووەم/ ئامادەگی دەروونی: پێویستە ڕۆژووەوان بە بایەخپێدانەوە كار لەسەر تۆخكردنەوەی لایەنی دەروونی بكات لە ڕۆژووەكەیدا، ئەویش بە خۆپاككردنەوە دەبێت لە كڕێژی ڕق و بوغزاندنی ئەم و ئەو، ئەوەش لە پێناو نزیكبوونەوە لە خوای گەورە و حاسڵبوونی دەرفەتی مێواندارییەكەی، بە تایبەت دەبێت خۆی لە خراپترین جۆرەكانی ڕق و كینە بە دوور بگرێت، كە ئەویش لە دڵگرتنی ڕق و كینەیە لە بەرامبەر كەسێك بەهۆی جلوبەرگەكەی یان شێوەكەی یان ڕەنگەكەی یان بۆچوونەكەی یان ئینتیماكەی و تاد.
سێیەم/ ئامادەگی كرداری: ئەگەر ڕۆژووەوان بیەوێت بە بەڕۆژووبوونەكەی لە خوای گەورە نزیك ببێتەوە و بە ڕەزامەندییەكەی شاد بێت، پێویستە هیچ مافێكی خەڵكانی دیكە لەسەر خۆی نەهێڵێت، چونكە ئەوەیان لە دژوارترین وێستگەكانی ڕۆژی دواییە، مانگی ڕەمەزانیش وێستگەیەكی پیرۆزە بۆ خۆپاككردنەوە لە مافی خەڵك و ڕاگەیشتنەوە بە دەرفەتی بەدەستهێنانی ڕەزامەندی خوای پەروەردگار.
نووسینی/ بەڕێوبەری ماڵپەڕی قەڵەم پرێس
إرسال تعليق