یارییەکە لەسەر یاریگای “ئیتیحاد”ـی تایبەت بە شینپۆشەکان بەڕێوەچوو و، تاکە گۆڵی یارییەکە لەلایەن ئەستێرەی ئەرجەنتینی یانەی مانچستەر سیتی “کۆن ئەگوێرۆ” لە خولەکی 63ـدا تۆمار کرا، پاش ئەوەی لە خولەکی 39ـدا ناوبژیوان بەرگریکار یانەی مانچستەر یونایتد “سمۆلینگ”ـی کردە دەرەوە و شەیتانە سوورەکان بە 10 یاریزان یارییەکەیان تەواو کرد.
لە گێمی یەکەمدا یارییەکە ورووژانێکی ئەوتۆی بەخۆیەوە نەبینی، بەڵام لە گێمی دووەمدا تا ڕادەیەك یارییەکە گەرموگوڕتر بوو، بە تایبەت دوای گۆڵی یەکەم، کە یانەی مانچستەر یونایتد زۆر هەوڵیدا ئەنجامەکە ڕاست بکاتەوە، بەڵام سەرەنجام یارییەکە بە ئەنجامی 1-0 کۆتاییپێهات و، شینپۆشەکانیش هەژموونی خۆیان بەسەر دێربی مانچستەر دووپات کردەوە.
بەو ئەنجامەش یانەی مانچستەر سیتی بە کۆکردنەوەی 22 خاڵ هاتە پلەی سێیەمی ڕیزبەندی خولی ئینگلیزی “پرێمەرلیگ”، مانچستەر یونایتدیش بە 13 خاڵ لە پلەی دەیەمدا مایەوە و مەینەتییەکانی ئەو وەرزەی بەردەوامن.
إرسال تعليق