لە کاتێکدا ئەمساڵ موسڵمانانی هەرێمی کوردستان پێشوازی لەو بۆنە ئایینیە پیرۆزە دەکەن، کە بە بارودۆخێکی ئێکجار دژواردا تێدەپەڕن و، چەندین ئاستەنگی گەورەیان لە بەردەمدا دروستبووە، هەر لە هەڕەشەکانی داعش و نەبوونی مووچە و قەیرانە سیاسییەکانەوە بگرە تا دەگاتە ڕووداوە کارەساتئامێزەکانی شەنگال و کۆبانێ و خۆرئاوای کوردستان، بە تەرزێك ژیانی هاونیشتیمانیانمان لێوانلێوە لە پەستی و پەژارەیی، بۆیە بە دڵێکی خەمناکەوە ساتەکانی جەژن بەڕێدەکەن و جارانئاسا چێژ لە جوانییەکانی جەژن وەرناگرن.
هەروەکو زۆربەی وڵاتانی جیهانی ئیسلامیش نوقمی ناسۆری و ناڕەحەتییە جۆربەجۆرەکان بوون، کە موسڵمانان لە میسر و لیبیا و فەڵەستین و یەمەن و تونس و سوریا و لوبنان و ئەفغانستان و و پاکستان و میانمار و تاد..، دووچاری ناخۆشترین هەلومەرجەکانی ژیان بوونەتەوە، بۆیە وێڕای پاڕانەوەمان لە خوای پەروەردگار، کە کۆتایی بە هەموو ناخۆشییەکانمان بێنێت و ناسۆرییەکانمان دواییان بێت، دووپاتیش لەوە دەکەینەوە، کە ئەوەش جۆرێکە لە تاقیکردنەوەی خودایی، کە دەبێ بە دڵێکی گەورەوە، بەرگەی لێکەوتە ناخۆشەکانی ئەو پێشهاتە سەختانە بگرین و، بیانکەینە دەرفەتێک بۆ بەدستهێنانی پاداشت و ڕەزمەندی پەروەردگاری گەورە.
جارێکی دیکە پیرۆزبایی خۆمانتان پێشکەش دەکەین، ئومێدەواریشین حەجی حاجیانمان قەبول بوو بێت و، کەشوهەوای جەژنی داهاتوومان جیاواتر لە کەشوهەوای جەژنی ئێشتا، تەژی بێت لە خۆشی و سەقامگیری و هێمنی و بەدیهێنانی خەون و مافە ڕەواکانمان بێت ئینشاڵا.
إرسال تعليق