“میرەکانی پاریس” .. نسکۆیەکی نوێ

یانەی پاریس سانجێرمانی فەڕەنسی، هەڵگری نازناوی وەرزی ڕابردووی خولی فەڕەنسی “لیگاوەن”، دوو خاڵی گرنگی لەدەستدا، کاتێك دوێنێ شەو لە یاری لووتکەی هەفتەی نۆیەمی “لیگاوەن”ـدا، لەسەر یاریگای خۆی “باخچەی میرەکان”، میوانداری یانەی مۆناکۆی کرد.

لە گێمی دووەمی یارییەکەدا، پاریسییەکان دەستپێشخەریان کرد و گۆڵێکیان لە خولەکی 71ـدا لە ڕێگەی یاریزان “لۆکاس دیگن”ـەوە تۆمار کرد، بەڵام لە خولەکی 92ـی یارییەکەدا، یانەی مۆناکۆی میوان گورزێکی کوشندەی لێ وەشاندن و گۆڵی یەکسانکردنەوەیان تۆمار کرد لە ڕێگەی یاریزان “ئەنتۆنی مارتیال”، یارییەکەش بە ئەو ئەنجامە 1-1 کۆتاییهات.

بەو ئەنجامەش، یانەی پاریس سانجێرمان کۆی خاڵەکانی گەیاندە 15 خاڵ لە پلەی سێیەمی ڕیزبەندی خولی فەڕەنسی “لیگاوەن”، ئەو یەکسانبوونەش بە شەشەمین یەکسانبوونی کەتیبەکەی “لۆران بلان”ـی ڕاهێنەر دادەنرێت لەو وەرزەدا.

شایەنی باسە، ڕۆژی سێشەممەی ڕابردوو، یانەی پاریس سانجێرمان لە دووەم یاری خۆی لە چوارچێوەی ڕکابەرییەکانی خولی یانە پاڵەوانەکانی ئەوروپا “چامپیۆنزلیگ”، میوانداری یانەی بەرشەلۆنەی ئیسپانی کرد و بە ئەنجامی 3-2 سەرکەوتنی بەدەستهێنا و هیوایەکی نوێی بە هەوادارانی بەخشییەوە بۆ گەڕانەوە بۆ سەر ڕێچکەی سەرکەوتنەکان.