لەو ڕووبەڕوونەوەیەدا، ماتادۆرەکان نەیانتوانی سەرکەوتن بەدەستبێنن و بە ئەنجامی یەکسانبوونی ئیجابییانە (1-1) لە یاریگا هاتنە دەرەوە، بەمەش ماتادۆرەکان دووچاری دوو شکستی گەورە بوون، یەکەمینیان: لەدەستدانی سێ خاڵی یارییەکە، دووەمینیان: هاتنە خوارەوەیان بوو لە لووتکەی ڕیزبەندی کۆمەڵەکەیان و ڕێگەخۆشکردن بۆ ڕکابەری سەرەکییەکان هەڵبژاردەی فەڕەنسا کە بە تەنیا لە لووتکەدا بمێنێتەوە، بێجگە لەوەش لە ڕووی دەروونییەوە تووشی گورزێکی کاریگەر بوون.
بە پێچەوانەی کەڵەشێرەکانی فەڕەنسا، کاتێك ئەوجارە بە دەنگێکی بەرز قووقاندیان و بە ئەنجامی (3-1) لە هەڵبژاردەی جۆرجیای بردەوە، بەو سەرکەوتنەشیان، کەڵەشێرەکانی فەڕەنسا لە چەندین ڕووەوە سوودمەندبوون، یەکەمینیان: سوودوەرگرتن لە شکستی ڕکابەرە سەرەکییەکەیان هەڵبژاردەی ماتادۆری ئیسپانیا و گرتنی لووتکەی پێشەنگی کۆمەڵەکەیان بە جیاوازی دوو خاڵ، دووەمینیان: دروستکردنی پاڵپشتییەکی مەعنەوی بەرز بۆ ڕووبەڕووبوونەوەی هەڵبژاردەی ماتادۆری ئیسپانیا، کە بڕیار وایە لە سێشەممەی داهاتوو لە پاریسی پایتەختی فەڕەنسا بەیەکبگەن، کە چاوەڕوان دەکرێت یارییەکەیان زۆر بەهێز و گەرموگوڕ بێت، بەو پێیەی یارییەکە چارەنووسساز و یەکلاییکەرەوەیە.
ئامادەکردنی/ دانا ڕواندزی
إرسال تعليق