وه‌ك خۆیان ده‌ڵێن، “گالاكسی S4” ئه‌لبومێكە له ته‌كنه‌لۆژیا، كه هه‌رگیز پێشتر نه‌بینراوه.
له مه‌راسمێكی جه‌ماوه‌ریدا، کە له هۆڵی میوزیكی شاری نیونیۆڕك بەڕێوەچوو، كۆمپانیای سامسۆنگی كۆری، كه یه‌كێكه له كۆمپانیا زه‌به‌لاحه‌كانی بواری ته‌نكنه‌لۆژیا، مۆبایلی “گالاكسی S4” ی نمایشكرد کە كۆمه‌ڵێك له تایبه‌تمه‌ندی نوێی لەخۆگرتووە، له‌نێویشیاندا توانای كۆنتڕۆڵكردنی ته‌له‌فۆنه‌كه به‌ته‌نها شه‌پۆلێكی جوڵانی ده‌ست له دووره‌وه.
كۆمپانیای سامسۆنگ كه هه‌میشه له ڕكابه‌ریدابووه له‌گه‌ڵ كۆمپانیای ئه‌مریكی “ئەپڵ”، توانی له دووساڵی ڕابردوودا ببێته ڕكابه‌ری سه‌ره‌كی كۆمپانیاكه له بازاڕی به‌رهه‌مهێنانی مۆبایلی زیره‌كدا، به‌ڕاده‌یه‌ك سامسۆنگ توانی زیاد له سەد ملیۆن مۆبایلی جۆری “گالاكسی S4” له ماوه‌ی یه‌كه‌م ده‌ستبه‌كاربوونییه‌وه له ساڵی ٢٠١٠دا بفرۆشێت، هه‌رچه‌نده هێشتا له ژێر ئه‌و ڕێژه‌یه‌وه‌یه كه كۆمپانیای “ئەپڵ” له‌هه‌مان ماوه‌دا توانی دووسەد و شەست و هەشت ملیۆن “ئایفۆن” بفرۆشێت، به‌ڵام گرنگی فرۆشتنی به‌رهه‌مه‌كانی سامسۆنگ له‌وه‌دایه، کە بگاته‌وه به كۆمپاینای “ئەپڵ”.
هەر لە چوارچێوەی مه‌راسیمه‌كه‌دا، كه ڕاسته‌خۆ له‌سه‌ر لاپه‌ڕه‌ی ڕه‌سمی سامسۆنگ له پێگەی “یوتیوب” په‌خشدەكرا، سامسۆنگ نرخی ته‌له‌فونه نوێیه‌كه‌ی ئاشكرا نەکرد، به‌و پێیه‌ی کە فرۆشتنی به‌رهه‌مه نوێیه‌كه له ماوەی نێوان مانگی نیسان و مایسدا له (١٥٥) وڵاتی جیهاندا ده‌بێت.
تایبه‌تمه‌ندییه‌كانی سامسۆنگ “گالاكسی S4”:
- کامێرا: مۆبایلەكه خاوه‌نی كامێرایه‌كی (١٣) مێگا پێكسڵه له پشته‌وه و، كامێرایه‌كی (٢) مێگا پێكسڵیش له ڕوی پێشه‌وه.
- شاشه‌ی مۆبایلەكه: شاشەکەی پێنج ئینچه و دیقه‌كه‌ی (١٩٢٠) به (١٠٨٠) پیكسڵه.
- پڕۆسێسه‌ر: (٩.١) گێگاهێرتز كواد-كۆڕ، یان (١.٦) گێگاهێرتز ئۆكتا-كۆڕ پڕۆسێسه‌ر.
- مێمۆری ناوه‌كی: (١٦) گێگابایت، (٣٢) گێگابایت، یان (٦٤) گێگابایت، له‌گه‌ڵ توانای زیادكردنی مێمۆری ده‌ره‌كی له‌شێوه‌ی (مایكرۆ SD).
- پاتری: دووهه‌زار و شەش سەد میلی ئه‌مپێر.
- سیسته‌می كارپێكردن: ئه‌ندرۆید (4.2.2)جه‌لی بین.
- وەرگێڕان: تایبەتمەندی وەرگێڕانی خێرا بۆ (٩) زمانی جیاواز، ئەو تایبەتمەندییە پەیوەست نییە بە ئینتەرنێت، چونکە بەبێ کارابوونی هێڵی ئینتەرنێتیش دەتواندرێت سوودی لێ ببینرێت.
- خزمەتگوزاری دەریاوانی: باشترکردنی خزمەتگوزاری دەنگیی یاریدەدەر،کە تایبەت بە پرۆسەکانی دەریاوانی.
- وێنەگرتن: زیادکردنی تایبەتمەندیی (دراما شۆت)، کە ڕێگەخۆشکەرە بۆ بەکارهێنەر سەد وێنە بگرێت و لە یەك چوارچێوە دایانبنێت.
یه‌كێكی تر له تایبه‌تمه‌ندییه‌كانی ئه‌م مۆبایله ئه‌وه‌یه، كاتێك ڤیدیۆیه‌ك له‌كاردایه، گه‌ر به‌كارهێنه‌ر چاوی له‌سه‌ر ته‌له‌فۆنه‌كه لاببات، ڤیدیۆكه ڕاسته‌وخۆ ده‌وه‌ستێت، تا به‌كارهێنه‌ر پشوویه‌ك وه‌رده‌گرێت، پاشان ده‌كه‌وێته‌وه كار، ئەویش لەو كاتەی به‌كارهێنه‌ر دووباره سه‌یری شاشه‌كه ده‌كاته‌وه.
هەروەکو سامسۆنگ توانی كێشه‌ی چیتر پیسبوونی شاشه‌ی ته‌له‌فونه‌كان له “گالاكسی S4” دا چاره بكات، ئه‌ویش به‌وه‌ی ته‌له‌فونه‌كه ده‌توانرێت به‌ته‌نها بە جووڵه‌ی ده‌ست و بێئه‌وه‌ی په‌نجه‌مان به‌ر شاشه‌كه بكه‌وێت، كاره‌كانی خۆی ئه‌نجام بدات.
ئەو بێجگە لە چەندین تایبەتمەندیی و تازەکاری سەرنجڕاکێش و سەرسوڕهێنەر، کە هەموو جیهان چاوەڕێی بە ڕەسمی فرۆشتنی دەکەن.
ئامادەکردنی بەشی تەکنەلۆژیا و زانیاری لە سایتی قەڵەم پرێس
إرسال تعليق