بەهرەمەندە بەڕازیلییەکە “لۆکاس سیلڤا”، درێسی شاهانەی پۆشی

دوای ئەنجامدانی پشکنینە پزیشکییەکان بۆ یاریزانە تازەکەی یانەی ڕیال مەدرید، بەهرەمەنی بەڕازیلی “لۆکاس سیلڤا”، وە تێپەڕاندنی پشکنینەکان لەلایەن ئەو یاریزانەوە بە سەرکەوتوویی، بەرەو یاریگای “سانتیاگۆ بێرنابیۆ” بەڕێکەوت بە مەبەستی ناساندنی بە شێوەیەکی ڕەسمی بە دەستگاکانی ڕاگەیاندن و هەوادارانی مێرەنگێ.

لەشوێنی تایبەت بە ڕاگەیاندنکاران و لەسەر یاریگای “سانتیاگۆ بێرنابیۆ”، قەرەباڵغییەکی زۆر هەبوو، ئینجا بە شێوەیەکی فەرمی “لۆکاس سیلڤا” ناسێنرا، ئەوەش دووەم گرێبەستی یانەی ڕیال مەدریدە لە ماوەی گواستنەوەی زستانەی یاریزانان، دوای ئەوەی هەفتەی ڕابردوو، بۆندی بەهرەمەندی لاوی نەڕویجی “ئۆدیگارد”ـی یەکلاییکردەوە.

یاریزانە بەڕازیلییە تازەکەی یانەی شاهانە “لۆکاس سیلڤا”، لە هێڵی ناوەڕاست یاریدەکات و، توانا و بەهرەیەکی گەورەی هەیە لە یاریکردن لەو ناوچەیەی یاریگادا، لە کاتی پێشکەشکردنیشی بە دەزگاکانی ڕاگەیاندن و مەدریدیستاکانیش، ناوبراو درێسی ژمارە ١٦ـی بەرز کردەوە.

شایەنی باسە، گرێبەستی “لۆکاس سیلڤا”، کە پاش ڕێککوتنی یانەی کرۆزیرۆی بەڕازیلی لەگەڵ یانەی ڕیال مەدرید واژۆکرا، بۆ ماوەی ٥ ساڵ و نیوە، نرخی گرێبەستەکەشی گەیشتە ١٤ ملیۆن یۆرۆیە.