لە لووتکه‌ی “کامپنۆ”ـدا، بلۆگرانا دەستباڵایی خۆی بەسەر ئه‌تله‌تیکۆ مه‌درید دووپاتکردەوە

دره‌نگانێکی دوێنێ شه‌و، یانه‌ی به‌رشه‌لۆنه‌ی ئیسپانی له‌سه‌ر یاریگای “کامپنۆ”، میوانداری یانه‌ی ئه‌تله‌تیکۆ مه‌دریدی ئیسپانی، ڕکابەرە سەرسەختەکەی بەمدواییانە، کرد.

یارییه‌که‌، که‌ له‌ میانی یارییه‌کانی چوونی قۆناغی هه‌شتی جامی شای ئیسپانیاوه‌ بوو، یانه‌ که‌ته‌لۆنییه‌که‌ سه‌رکه‌وتنی به‌ گۆڵێکی بێبه‌رامبه‌ر به‌سه‌ر ڕۆخی بلانکۆس به‌ده‌ستهێنا، که‌ له‌ خوله‌کی ٨٥ـی یارییه‌که‌دا، “لیۆنێل مێسی” به‌لێدانی په‌ناڵتی گۆڵه‌که‌ی تۆمار کرد.

ئه‌و بردنه‌وه‌یه‌ی یانه‌ی به‌رشه‌لۆنه‌، دوای بردنه‌وه‌که‌ی سەرەتای هه‌فته‌ی ڕابردووی بوو له‌ هه‌مان یانه‌ له‌میانی ڕکابه‌رییه‌کانی خولی ئیسپانی “لیگا” به‌ ئه‌نجامی ٣-١، به‌وه‌ش یانه‌ که‌ته‌لۆنییه‌که‌ تا ڕادەیەك له‌ گرێی ده‌روونی ئه‌و یانه‌ ڕزگاریبوو، چونکه‌ له‌ وه‌رزی ڕابردوو و له‌ پاڵه‌وانێتییه‌ جیاوازه‌کاندا، سەرئێشەیەکی زۆری بۆ دروستکرد بوو و، تووشی شکستی زۆر گه‌وره‌ دەهات و نه‌یده‌توانی لێی بباته‌وه‌.

ماوه‌ته‌وه‌ بڵێین، له‌ ڕۆژی چوارشەممەی هه‌فته‌ی داهاتوو، یاری گه‌ڕانه‌وه‌ له‌سه‌ر یاریگای “فیسێنتی کالدیرۆن”ـی تایبه‌ت به‌ یانه‌ مه‌دریدییه‌که‌ ئه‌نجام دەدرێت و، تێیدا به‌ ڕه‌سمی یانه‌ی سه‌رکه‌وتوو بۆ قۆناغی چوارگۆشه‌ی زێڕین بناسرێت.