هەر چەندە لە پێنج ساڵی ڕابردوودا کەتیبەکەی “ئارسین ڤینگەر” نەیانتوانیبوو سەرکەوتن بەسەر یانەی مانچستەر سیتی لەسەر یاریگای “ئیتیحاد”بەدەستبهێنن، بەڵام ئەو ئاستە بەرزەی یانە لەندەنییەکە بە درێژایی ٩٠ خولەکی یارییەکە پێشکەشیکرد زۆر سەرسوڕهێنەر بوو.
یانەی مانچستەر سیتیش بەبێ ئەستێرە درەوشاوەکەی “یەحیا تۆرێ”، ڕێگەی لێ ون ببوو، هەر بۆیەش نەیتوانی یارییەکە بباتەوە، بەڵکو بە ئەنجامی دوو گۆڵی بێبەرامبەر شکستیهێنا.
گۆڵەکانی یانەی ئەرسناڵ لە خولەکەکانی ٢٤ و ٦٧ لەلایەن هەریەك لە “سانتی کازۆرلا” بە لێدانی سزا و “ئۆلیڤیە گیرۆ”ـەوە تۆمارکران.
بەو ئەنجامەش کۆی خاڵەکانی یانەی مانچستەر سیتی ٤٧ خاڵ وەکو خۆی لە پلەی دووەم مایەوە، یانەی ئەرسناڵیش بە کۆکردنەوەی ٣٩ خاڵ هاتە پلەی پێنجەم، سوودمەندی هەرە گەورەش لە ئەنجامی ئەو یارییە یانەی چێلسی بوو، کە ئێستا خاوەنی ٥٢ خاڵە لە لووتکەی ڕیزبەندی بە جیاوازی ٥ خاڵ لە ستیزن دوورە.
إرسال تعليق