هەر لە سەرەتای گێمی یەکەمەوە، یانەی شاهانە کۆنتڕۆڵی یاریگای کرد و بە پلانی هێڕشبردن پێشڕەویکرد، ئەندەلوسییەکانیش بە پلانی بەرگری و بەهێزکردنی هێڵی دواوە، بەربەستیان خستە بەردەم ئەستێرەکانی یانەی مێرەنگێ، دوای لەدەستدانی چەندین دەرفەتی گۆڵ تۆمارکردن، لە خولەکی (30)ـی یارییەکەدا و لە هێڕشێکی هەڵگەڕاوەی خێرادا، “کریستیانۆ ڕۆنالدۆ” گۆڵی یەکەمی یانەی ڕیال مەدریدی تۆمارکرد و ئەرکی ئیشبیلیەی زەحمەت کرد، بەو تاکە گۆڵەش گێمی یەکەم کۆتاییهات.
لەگەڵ دەستپێکردنی گێمی دووەمیش، یانەی شاهانە بە هەمان ڕیتمی گێمی یەکەم یاریان کرد و لە خولەکی (49)ـدا و لە لە تۆپێکی بەهێزی “کریستیانۆ ڕۆنالدۆ”، یانەی ڕیال مەدرید گۆڵی دووەمی تۆمارکرد و ئەرکی ئیشبیلیەی زیاتر زەحمەت کرد، ئەندەلوسییەکان ئەوجارە درکیان بە مەترسی ڕاستەقینەی لەدەستدانی نازناوەکە کرد و هەوڵیاندا بگەڕێنەوە ناو کەشوهەوای یارییەکە، بەڵام ئەوەیان کارێکی ئێکجار زەحمەت بوو لە بەرامبەر یاریزانانی ڕیال مەدرید کە توانای جەستەیی و جێبەجێکردنی پلانی ڕاهێنەر تەواو ئامادە بوون، لە بەرامبەر ئەو بەئاگاهاتنەوەی یاریزانانی ئیشبیلیە، هاوڕێکانی “کریستیانۆ ڕۆنالدۆ” بێدەنگ نەبوون، بەڵکو بەردەوامبوون لە سەرکێشییەکەیان و پێشڕەویکردن بەرەو گۆڵی ئەندەلوسییەکان، سەرنجام یارییەکە بە بردنەوەی ڕیال مەدرید بە ئەنجامی (2-0) کۆتاییهات، یانەی ئیشبیلیەش بە شکستێکی دەروونی ناخۆشەوە دەچێتە ناو ڕکابەرییەکانی وەرزی نوێوە.
بەو ئەنجامەش یانەی ڕیال مەدرید بووە پاڵەوانی جامی سوپەری ئەوروپی و بە شایستەیی جامەکەیان بەرز کردەوە، هاوکات هێزێکی دەروونیان وەرگرت بۆ خۆ ئامادەکردن بۆ چنینەوەی نازناوەکان لە وەرزی نوێدا.
إرسال تعليق